معنى الحروف في معالجات انتل و إزاي تختار المعالج المناسب ليك

يا ترى ايه معنى الحروف في معالجات انتل ؟

لازم تعرف إن كل حرف و رقم في اسم معالج إنتل ليه معنى معين بيقولك قد إيه المعالج ده قوي وبيقدر يعمل إيه.

فخلينا نفهم الكلام دة خطوة بخطوة :

في البداية خلينا نبدأ بمعنى ال core i :-

احنا عندنا Core i3، i5، i7، i9 : دول زي درجات في المدرسة كده، كل ما الرقم بقا أكبر, كل ما المعالج كان أقوى وأسرع في شغله. يعني i9 أقوى من i7 وأقوى من i5 وهكذا.

بعد كدة بقا الرقم اللي بعد Core i :-

الرقم ده بيقولك المعالج ده من الجيل الكام. يعني لو لقيت معالج Core i7-13700K، الرقم 13 ده معناه إن المعالج ده من الجيل الثالث عشر، وكل ما كان الجيل أحدث كل ما التكنولوجيا اللي فيه أجدد.

و بالتالي بتاخد سرعة أكبر بس برده السعر بيزيد مع كل جيل زيادة.

ندخل بعد كدة على معنى الحروف في معالجات انتل اللي بتكون موجودة في أخر إسم المعالج :-

الحروف ديه بتشرحلك قوة المعالج و كفائته و سرعته معاك هتبقا عاملة إزاي و بتشرحلك حاجات تانية عن المعالج.

و الحروف عندنا بتكون:-

• حرف K : يعني المعالج ده “مفتوح” بمعنى إنك تقدر تكسر سرعته ببرامج معينة مخصصة لدة و بالتالي لو الشركة بتقول إن أعلى سرعة ليه مثلاً 4.0GHz فانت ممكن بكسر السرعة توصل ل 4.3GHz مع العلم طبعا ان دة هيزود من درجات الحرارة.

• حرف U، Y : دي معالجات صغيرة بتحافظ على البطارية، بتلاقيها دائما في اجهزة اللاب توب اللي وزنها خفيف و حجمها صغير جدا.

ديه روابط شراء للاب توب فيه معالج بحرف u او y :

لاب توب Lenovo 11e – لاب توب hp probook 650 g2

• حرف m : معناه (mobile) يعني دة معالج بتاع لاب توب مش ديك توب.

الحرف دة مش موفر للطاقة زي حرف u, بس في نفس الوقت بيكون 2 نواة بس و بالتالي أدائه مش افضل حاجة.

• حرف MQ : هو نفسه حرف m, بس بيكون 4 نواة بدل 2 نواة و حرف Q إختصار لكلمة quad يعني رباعي.

و الأداء بتاعه طبعا بيكون اعلى من حرف ال m في المعالج, و بيكون موجود في أجهزة الورك ستيشن و اللاب توب.

• حرف HQ : هو نفسه حرف MQ بس بدأ يستخدم بداله من أول الجيل السادس في معالجات انتل. و هو معالج رباعي النواة و بيقدم أداء عالي في الالعاب او الجرافيك.

ديه روابط شراء للاب توب فيه معالج بحرف  HQ :

لابتوب dell precision 7710 – لابتوب dell precision 7520

• حرف H : هو تطور لحرف HQ بدأ يستخدم من الجيل الثامن.

و دة لأن حرف Q كان بيرمز لرباعي النواة, في حين إن المعالجات من أول الجيل الثامن بقت فيها 6 أنوية أو اكتر.

و معالج H برده بيقدم أداء عالي في الالعاب او الجرافيك.

ديه روابط شراء للاب توب فيه معالج بحرف  HQ :

لابتوب dell precision 7540 – لابتوب dell precision 7730

• حرف T : ديه نفس معالجات  u و Y بس في أجهزة الديسك توب.

معالجات بسيطة مش قوية أوي، بتكفي للاستخدامات العادية.

• حرف X : دي أقوى معالجات في العالم، بتستخدم في شغل احترافي زي تصميم الألعاب.

و ممكن تشوف الشرح بتاعنا على يوتيوب لمعنى حروف معالجات انتل

طيب، إزاي تعرف إن معالج أقوى من معالج تاني؟

لازم عشان تقارن بين معالجين تبص على كذا وجه مقارنة منهم :-

• عدد النواة والخيوط (cores,threads) : النواة عاملة بالظبط زي العامل في المصنع، كل ما عدد العمال بقا أكتر, كل ما الشغل خلص بسرعة اكبر. والخيوط (threads) عاملة زي مساعد للعامل، فكل ما عدد المساعدين للعمال بقا أكتر كل ما العامل قدر يخلص شغله اسرع.

• تردد المعالج (clock speed) : دي زي سرعة دوران المحرك في العربية، كل ما السرعة بقت أعلى كل ما المعالج بقا أسرع.

• ذاكرة الكاش (cache) : دي زي الرف اللي بيحط فيه العامل الأدوات اللي بيستخدمها كتير، كل ما الرف ده أكبر كل ما العامل قدر يوصل للأدوات بتاعته اسرع و بالتالي يخلص شغله اسرع.

أزاي اختار المعالج المناسب؟

• حدد ميزانيتك: مش كل المعالجات غالية، في معالجات مناسبة لكل ميزانية.

• حدد استخدامك: لو بتلعب ألعاب قوية محتاج معالج قوي، ولو بتستخدم الكمبيوتر في شغل بسيط مش محتاج معالج قوي أوي.

• ابحث عن أحدث التقنيات: كل ما الجيل بقا أحدث كل ما المعالج بقا أفضل.

• قارن بين المواصفات: قارن بين عدد النواة، التردد، وحجم ذاكرة الكاش للمعالجات المختلفة.

خلاصة الكلام:

اختيار معالج مناسب مش صعب، بس محتاج شوية فهم للمواصفات. لو فهمت معنى كل حرف و رقم في اسم المعالج، هتقدر تختار المعالج اللي يناسب احتياجاتك وميزانيتك.

متنساش تزور صفحتنا على فيسبوك اللي بينزل عليها كل العروض الجديدة

و ممكن تبعتلنا عليها لو عندك أي سؤال أو حابب تستفسر عن أي لاب توب